గజల్..1136..

మరణమంటె ఏమున్నది తోటగేటు మూసినట్లు..!
పుట్టుకంటె బ్రతుకువిలువ తెలియ మరలినట్లు..!

బాధపెట్టు బాధుండదు నీవు కోరి పడకుండా..
మనిషంటే చిరునవ్వుల చెట్టు మొగ్గ తొడిగినట్లు..!

ప్రాణమెంత తియ్యనిదో పోతుంటే తెలుస్తుంది..
పూవు త్రెంచ కన్నబిడ్డ గొంతు పట్టి నరికినట్లు..!

యుద్ధనీతి కోవిదులకు వేదాంతం చెప్పడమా..?!
భయపడితే నీకు నీవు మంటలలో దూకినట్లు..!

మిసైలేమి చేయగలదు మౌనం విస్పోటిస్తే..
సరిహద్దుల నాటకాల వేదికలను పేల్చినట్లు..!

మాధవుడా..సాక్షిలాగ నిలచు విద్య నేర్వవేమి..!?
చెలిమిగుట్టు పట్టకుంటె నీడలతో పోరినట్లు..!